काठमाडौं । पृथ्वी राजमार्गअन्तर्गत नौबिसे-मुग्लिन सडकखण्डमा खसेका पहिरो हटाइए पनि मुग्लिन-नारायणगढ खण्डमा अझै अवरोध कायमै छ । गएरातिदेखि खसेका पहिरोले राजधानी काठमाडौंको लाइफलाइन मानिने यस राजमार्गको ठप्प पारेपछि हजारौं यात्रु अलपत्र परेका छन् भने जनजीवन अस्तव्यस्त बनेको छ ।
जिल्ला प्रहरी कार्यालय धादिङका अनुसार नौबिसे-मुग्लिन सडकखण्डका जवाङखोलालगायतका स्थानमा खसेका सबै पहिरो डोजर प्रयोग गरी राति नै हटाइएको छ । यससँगै यो खण्डमा यातायात आंशिक रूपमा सुचारु भएको छ । तर, रातभर सडकमै रोकिएका सवारीसाधनहरूको अत्यधिक चापका कारण लामो लाइन लागेको छ ।
यद्यपि, मुग्लिन-नारायणगढ खण्डको तुइन खोला नजिक खसेको पहिरो भने हटाउने काम जारी छ । बुधबार साँझ परेको पानीले पहिरो पन्छाउने काममा अवरोध पुर्याएको थियो । आज बिहानैबाट पुनः पहिरो हटाउने काम तीव्र गतिमा भइरहेको छ । सडक डिभिजन कार्यालय भरतपुरले दिएको जानकारीअनुसार, मुग्लिन-नारायणगढ खण्डका सबै पहिरो हटाएर बाटो पूर्ण रूपमा खुलाउन कम्तीमा दुई दिन लाग्न सक्ने अनुमान गरिएको छ ।
